‘परालको आगो’ को छायांकन सकियो

काठमाडौं । सुशील पोखरेलले निर्माण गरिरहेको चलचित्र ‘परालको आगो’ को छायांकन सकिएको छ । दसैंअघिबाट म्याग्दीका विभिन्न स्थानबाट छायांकन थालिएको यो चलचित्रको छायांकन ४० दिनमा समाप्त भएको हो । छायांकन सकिएलगत्तै रिलिज डेट पनि सार्वजनिक गरिएको छ । फिल्म आगामी वैशाख ११ गतेबाट प्रदर्शनमा आउने निर्माता पोखरेलले बताए ।
उनले फिल्मका चारवटा गीतसहित सम्पूर्ण छायांकन पूरा भएको र रिलिज डेट समेत तोकिएको बताए । जेनजी आन्दोलन, वर्षा र पहिरोको कारण सेड्युलभन्दा १० दिन बढी समय लागेको हो । फिल्ममा सौगात मल्ल, प्रकाश सपुत, सुहाना थापा, बाल कलाकार एन्जिला बानियाँ, सिर्जना अधिकारी, शंकर आचार्य, किशोर भण्डारी, कुलदीप अधिकारी, सरिता भण्डारी, रेणु न्यौपानेलगायतले अभिनय गरेका छन् ।
सुशील देवकोटाको लेखन रहेको फिल्मको निर्देशन लक्ष्मण सुनारले गरेका छन् । फिल्ममा गीत सुरेन्द्र राना, मनबहादुर मुखिया र प्रकाश सपुतले लेखेका छन् । त्यसैगरी संगीत शान्ति ठटाल, सत्य स्वरूप र अभिनेता प्रकाश सपुतको रहने छ । फिल्म संकल्प भुजेलले खिचेका हुन् भने कोरियोग्राफी रामजी लामिछानेले गरेका छन् । नगेन्द्र घिमिरेले प्रोडक्सन म्यानेजरको जिम्मा लिएको यो फिल्मको वितरण आर.आर फिल्मस् र ओटीटी राइट ओएसआरले रिलिज पूर्वनै लिइसकेका छन् ।