न्यूयोर्कको मेयर बने ३४ वर्षे र्‍यापर मम्दानी

न्यूयोर्क ः मुस्लिम समुदायका ३४ वर्षका र्‍यापर जोहरान मम्दानी अमेरिकाको सबैभन्दा ठूलो सहर न्यूयोर्क सिटीको नगरप्रमुखमा निर्वाचित भएका छन् । अमेरिकी राष्ट्रपति डोनाल्ड ट्रम्पका कट्टर आलोचक मानिएका माम्दानी भारतीय मूलकी चर्चित फिल्म निर्देशक मीरा नायरका छोरा हुन् । राष्ट्रपति ट्रम्पले उनी निर्वाचित भए न्यूयोर्कलाई दिइने संघीय बजेट कटौती गर्ने चेतावनी दिएका थिए । तर ट्रम्पलाई चुनौती दिँदै उनी भारी मतले विजयी भए ।
चुनाव जितेपछि समर्थकहरूलाई सम्बोधन गर्दै मम्दानीले यो विजयले न्यूयोर्कवासीहरूले परिवर्तनका लागि कार्यादेश दिएको टिप्पणी गरेका छन् । आधा घण्टाको भाषणमा मम्दानीले निर्वाचन प्रचारप्रसारका बेला गरेका वाचाहरू दोहो¥याउँदै तिनलाई पूरा गर्ने बताए । उनले भने, अन्धकारमय यो बेला न्यूयोर्क उज्ज्यालो बन्ने छ ।
ट्रम्पलाई जबाफ दिने क्रममा उनले जुन सहरले उनलाई उदाउन सघायो त्यसैले उनलाई पराजित पनि गर्न सक्ने बताए । उनले आफ्नो पक्षमा मतदान नगर्ने मानिसहरू, यहुदीविरोधी भावनाबाट पीडित यहुदीहरू र आप्रवासीहरूसहित सबै न्यूयोर्कवासीहरूका पक्षमा उभिने वाचा गरे ।
न्यूयोर्क सिटीमा उनको चयनलाई धेरै अर्थमा महत्त्वपूर्ण मानिएको छ । यो महानगरमा उनी सन् १८९२ पछि निर्वाचित सबैभन्दा कान्छा नेता हुन् । उनी न्यूयोर्कमा मेयर हुने पहिलो मुस्लिम तथा अफ्रिकामा जन्मिएका पहिलो व्यक्ति पनि हुन् ।
यति मात्रैले पनि पूर्व गभर्नर एन्ड्रू क्वोमो र रिपब्लिकन उम्मेदवार कर्टिस सिल्वामाथि उनको विजय स्मरणयोग्य बनाएको छ । उनी डेमोक्र्याटिक पार्टीमा प्रगतिशील विचार राख्ने कतिपय व्यक्तिहरूले वर्षौँदेखि खोज्दै आएका नेता पनि हुन् ।
उनले निःशुल्क बालस्याहार, सार्वजनिक यातायातको विस्तार र स्वतन्त्र बजारमा सरकारी हस्तक्षेपजस्ता वामपन्थी झुकावका मुद्दा उठाएका छन् । मम्दानीले कामकाजी वर्गका मतदाताका खास आर्थिक समस्याबारे पनि ध्यान दिन सक्ने आफ्नो दक्षता प्रदर्शन गरेका थिए ।
न्यूयोर्कका पूर्वगभर्नर र गभर्नरकै छोरा समेत रहेका क्वोमोलाई पराजित गर्न उनलाई सहज थिएन । त्यसैले पनि मम्दानीको चुनावी प्रचारले सञ्चारमाध्यमको ठूलो ध्यान तानेको थियो । यसको अर्थ उनका सफलता र विफलताहरूमा अब धेरैको ध्यान जाने छ ।
उनले चुनावी प्रचारका क्रममा हिन्दी चलचित्रका शब्दहरू मिश्रित उर्दूमा पनि भाषण गरेका थिए भने त्यस्तै भिडियो पनि बनाएका थिए । उनले स्पेनिश भाषामा पनि प्रचार गरेका थिए ।
उनकी २७ वर्षकी श्रीमती रामा दुवाजी छिन् जसलाई उनले डेटिङ एपमा भेटेका थिए । उनका बुवा प्राध्यापक महमूद मम्दानीले कोलम्बियामा प्राध्यापन गर्छन् । राजनीतिमा आउनुअघि उनले घरजग्गाबारे परामर्शदाताका रूपमा काम गरेका थिए। त्यस बेला उनले क्वीन्समा न्यून आय भएका मानिसहरूलाई सहयोग गरेका थिए ।