फागुन २९ गतेदेखि देशभर ‘स्त्री’

काठमाडौँ । जीवन शाहीको लेखन तथा निर्देशनमा निर्माण भइरहेको चलचित्र ‘स्त्री’ फागुन २९ गतेदेखि देशभरका हलमा प्रदर्शनमा आउने भएको छ । मिति घोषणासँगै चलचित्रको शीर्षक डिजाइन पनि सार्वजनिक गरिएको छ ।
मेला रेकर्डिङ स्टुडियोको ब्यानरमा समीर राईले निर्माण गरेको यो चलचित्रमा निर्देशक शाहीकै कथा रहेको छ भने पटकथा लेखनमा उनलाई किशन अर्यालले सहयोग गरेका छन् । रामशरण उप्रेतीको छायांकन, बाबुल गिरीको संगीत, देव महर्जनको द्वन्द्व निर्देशन रहेको चलचिको प्रमुख सह–निर्देशकमा चन्द्र भण्डारी छन् । चलचित्रमा श्याम बरालको मेकअप र सुकनिता चौलागाईंको ड्रेस डिजाइन रहनेछ ।
सह–निर्मातामा सहदेव बिष्ट, प्रमोद भट्टराई प्रतीक, रिता श्रेष्ठ र मञ्जु राजबंशी रहेका छन् । सयौँ म्युजिक भिडियो निर्देशन गरिसकेका जीवन शाहीको ‘स्त्री’ डेब्यु फिल्म हो । सामाजिक कथामा तयार भइरहेको यस चलचित्रमा प्रमोद अग्रहरी, सलोन बस्नेत, रिस्ता बस्नेत, नम्रता श्रेष्ठ, दिनेश डिसी र दीपाश्री निरौलाले अभिनय गरका छन् । बालकलाकार दिप्सन चिलवाल पनि फिल्ममा देखिनेछन् ।
नारी–केन्द्रित कथामा बनेको ‘स्त्री’ को डिजिटल अधिकार ओएसआर डिजिटलले खरिद गरिसकेको छ भने फिल्मलाई एप्पल इन्टरटेनमेन्ट, एफडी र रिच इन्टरटेनमेन्टले देशभर वितरण गर्नेछन् ।