ब्रिटेनका राजकुमारको उपाधि खोसियो

लन्डन (एजेन्सी) ः नाबालिगलाई यौन व्यवसायमा लगाउन खोजेको आरोपमा दोषी ठहर भएका जेफ्री एप्स्टीनसँग घनिष्ठता भएको देखिएपछि छानबिनमा परेका ब्रिटेनका राजकुमार एन्ड्रूले राजकुमार उपाधि गुमाउने भएका छन् । यसका साथै उनले राजकीय आवास रोयल लज पनि छाड्नुपर्ने भएको छ । बकिंघम प्यालेसका अनुसार राजा चाल्र्सका भाइ अब एन्ड्रू माउन्टब्याटन विन्ड्जर नामले मात्रै चिनिने छन् । उनको निजी जीवनबारे अनेकौँ प्रश्न उठेपछि एन्ड्रूले ‘ड्यूक अफ योर्क’ सहितका अन्य राजकीय उपाधिहरू यसअघि नै परित्याग गरेका थिए ।
यही महिनाको आरम्भमा प्रकाशित संस्मरणमूलक पुस्तकमा भर्जिनिया जुफ्रेले आफूले किशोरावस्थामा राजकुमार एन्ड्रूसँग तीन पटक यौन सम्बन्ध राखेको दाबी दोहो¥याएकी छन् । उक्त पुस्तक मरणोपरान्त प्रकाशित भएको हो । एन्ड्रूले उक्त आरोप सधैँ खण्डन गर्दै आएका छन् । अहिले विकसित घटनाक्रमबारे प्रतिक्रिया व्यक्त गर्दै जुफ्रेको परिवारले उनले सत्य र असाधारण आँटका कारण ब्रिटिश राजकुमारलाई उपाधिविहीन बनाएको बताएको छ । जुफ्रेले यसै वर्षको आरम्भमा आत्महत्या गरेकी थिइन् । राजदरबारले राजाबाट राजकुमार एन्ड्रूका राजकीय पद, उपाधि र सम्मानहरू हटाउने औपचारिक प्रक्रिया सुरु भएको जनाएको छ । उनको राजकीय उपाधिसँगै राजकीय आवास छोड्नका लागि औपचारिक सूचना पनि दिइएको दरबारले जनाएको छ । उनी राजा चाल्र्सले किनिदिएको सान्ड्रिंगम इस्टेटस्थित निजी आवासमा सर्ने छन् ।
एन्ड्रूले आफूमाथि लागेका आरोप अस्वीकार गर्दै आएका भए पनि यस्ता कारबाही आवश्यक भएको राजदरबारले जनाएको छ । राजदरबारले “सबै प्रकारका दुव्र्यवहारका पीडितमाथि आफ्नो साथ रहने जनाएको छ । एन्ड्रूका दुई छोरी युजनी र बिट्रिसको राजकुमारी उपाधि भने यथावत् रहने छ ।