बाबुछोराको कथा बोकेको ‘परान’ देशभर

काठमाडौं ः पारिवारिक कथामा बनेको चलचित्र ‘परान’ कात्तिक १४ गते शुक्रबारबाट देशभर प्रदर्शनमा आएको छ । रिलिजपूर्व बिहीबार काठमाडौंमा आयोजित प्रिमियरमा चलचित्रले उत्कृष्ट प्रतिक्रिया पाएको थियो ।
प्रिमियरपछि अभिनेता हरिवंश आचार्यले निर्देशक दीपक आचार्यको डेब्यु फिल्म उत्कृष्ट रहेको भन्दै ’परान’ले देखाएको कथा हरेक गाउँको समस्या भएको बताए । उनले परान हेर्दा धेरैलाई आफ्नो घरको कथा महसुस हुने अनुभव सुनाए । अहिले प्रदर्शनरत ’जेरी अनटप’का निर्देशक सुयोग गुरुङले परान छुटाउनै नहुने फिल्म बनेको प्रतिक्रिया दिए । प्रिमियरमा फिल्मका निर्माताद्धय शेखर गोल्छा र रञ्जित आचार्यलाई फिल्म निर्माणमा प्रवेशसँगै उत्कृष्ट फिल्म दिएकोमा बधाई तथा शुभकामना दिए ।
फिल्मले आफ्नो उमेरको उत्तराद्र्र्धमा रहेका एक बुबाको कथा भन्छ जो आफ्ना सन्तानको नजिक रहन चाहन्छ । तर सन्तानका आफ्नै प्राथमिकताका कारण ती चाहना पूरा हुन सक्दैनन् । चलचित्रमा नीर शाह, मदनकृष्ण श्रेष्ठ, पूजा चन्द, महेश त्रिपाठी, अञ्जना बराइली, केकी अधिकारी, प्रवीण खतिवडा, बुद्धि तामाङ, यासेली योङहाङ, बबिन राई, पुष्पराज ओझा, सीमा काफ्ले, दमन रुपाखेती, यमन श्रेष्ठ, सुब्रतराज आचार्य, सुरेश थापा, विनोद राई र बाल कलाकार आर्यादीप आचार्यले अभिनय गरेका छन् ।
फिल्मका गीतमा निर्देशक दीपक आचार्यकै शब्द र रिदम कँडेलको संगीत रहेको छ भने प्रमोद खरेल, पुष्पन प्रधान र रचना रिमालले स्वर दिएका छन् । छायांकन शिवराम श्रेष्ठले गरेका हुन् भने सम्पादन मित्र डी. गुरुङले गरेका छन् । कोरियोग्राफी सुनील क्षेत्रीले गरेका छन् ।